Tapangke ma Hata Batak i

Asa Unang Mago Tapangke ma Hata Batak i

Pandok ni UNESCO (ima sada badan ni Sarikat ni Angka Bangso na mamingkirhon taringot tu parsingkolaan, parbinotoan dohot kebudayaan), diparetonghon naeng rasip manang siap ma 2500 bahasa manang parhataan ni jolma di portibi on.
Amang oi, dangol na i ake. :-) Holan tinggal 6000 bahasa nama na adong di portibi on jala di bagasan tolu pulu taon na parpudi on lobi do sian 200 bahasa mago tu tano songon dinosaurus i najolo.

Jala na binoto (Daniel T.A. Harahap di rumametmet.com), hita di Indonesia on ma sada bangso na mansai mamora taringot tu bahasa manang parhataan. Lobi sian 500 bahasa adong di luatta Indonesia na maragam on, jala dua ratus sian i di Papua do ingananna.

Beha do molo bahasa Batak ?
Nunga leleng sai binege holso dohot sarita ni angka natuatua lam tu otikna nama angka sundut na umposo na mangantusi hata Batak. Ra satolop do hita disi. Sungkunsungkun di rohaniba: boasa?
Boasa ndang dihasiholi angka naposo jaman nuaeng be mangguruhon hata Batakta i?
Jala angka natuatua sandiri boasa ndang diharingkothon mangajari ianakhonna asa diboto marhata Batak?
Ai molo sai dipasomalsomal nasida marhata Batak tu ianakhonna sian na metmet (unang holan di tingki muruk) tontu diantusi dakdanak i hata Batak i nang dung balga ibana, jala lam holong ma rohana di adat batak i?

Beta hita marhata batak, ai harugian bolon do hita saluhutna nang di hajolmaon pe molo mago bahasa batak i sian portibi on. Asa unang mago manang rasip ingkon ujionta do mambahen hata batak i ndada holan “bahasa lisan” (panghataion, pollung, kombur) alai dohot do “bahasa tulisan” (panuratan). Beha didok rohamuna, angka dongan Batak...

Beta rap marsiajar hita hata Batak, roma hamu angka dongan tu son : https://www.facebook.com/groups/hbatak/

-----------------------------------
istilah di hata Batak :
rasip, siap = musnah, punah
gurat = goresan, coretan
gurit = tulisan cukilan di bambu
manggunjal = bergejolak
pollung = omongan kosong
-----------------------------------